Get real time updates directly on you device, subscribe now.
ଢେଙ୍କାନାଳ : ଢେଙ୍କାନାଳ ସଦର ଥାନା ଅନ୍ତର୍ଗତ ଝାରଗାଡିଆଠାରୁ ବଉଳପୁରକୁ ସଂଯୋଗ କରୁଥିବା ୩ କିଲୋମିଟର ରାସ୍ତା ମରାମତି ଅଭାବରୁ ଅତି ଶୋଚନୀୟ ହୋଇପଡିଛି । ରାସ୍ତାସାରା ଖାଲଖମାରେ ପରିପୂର୍ଣ୍ଣ ହୋଇ ରହିଛି ।
ବର୍ଷା ହେଲେ ରାସ୍ତା ଆହୁରି କଦର୍ଯ୍ୟ ହୋଇପଡୁଛି । ରାସ୍ତାରେ ଆଣ୍ଠୁଏ ଲେଖାଏଁ ପାଣି ଜମୁଥିବାରୁ ଖାଲଖମା ଜଣାପଡୁନାହିଁ । ରାସ୍ତାରେ ଗାଡିମଟର ଗଲେ ଦୁର୍ଘଟଣାର ସମ୍ମୁଖୀନ ହେଉଛନ୍ତି ।
ଛୋଟପିଲାମାନେ ବିଦ୍ୟାଳୟକୁ ଗଲାବେଳେ ନାନା ଅସୁବିଧାର ସମ୍ମୁଖୀନ ହେଉଛନ୍ତି । ଗତ କିଛିଦିନ ମଧ୍ୟରେ ଏହି ରାସ୍ତାରେ ୫ ଜଣ ଛାତ୍ରଛାତ୍ରୀ ଆହତ ହୋଇସାରିଲେଣି । ସେହିପରି ଅନେକ ଲୋକ ମଧ୍ୟ ଗାଡିରୁ ପଡି ଖଣ୍ଡିଆଖାବରା ହେଲେଣି ।
ଏହାକୁ ନେଇ ସଦାଶିବପୁର ସରପଞ୍ଚ ଧରିତ୍ରୀ ମଲ୍ଲିକ ବିଭାଗୀୟ କର୍ତ୍ତୃପକ୍ଷ ଏବଂ ଜିଲା ପ୍ରଶାସନର ଦୃଷ୍ଟି ଆକର୍ଷଣ କରିଥିଲେ । ମାତ୍ର କୌଣସି ପ୍ରତିକାର ନହେବାରୁ ଶନିବାର ସକାଳୁ ସଂଧ୍ୟା ପର୍ଯ୍ୟନ୍ତ ସୁଧାଡିହକାଟେଣୀ ଗ୍ରାମବାସୀମାନେ ଝାରଗାଡିଆ-ବଉଳପୁର ରାସ୍ତାକୁ ଅବରୋଧ କରି ରଖିଛନ୍ତି । 
ପ୍ରଥମେ ଝାରଗାଡିଆ ଫାଣ୍ଡି ଅଧିକାରୀ ଆନେ୍ଦାଳନକାରୀଙ୍କ ନିକଟକୁ ଯାଇ ବୁଝାସୁଝା କରିଥିଲେ ମଧ୍ୟ ସେମାନେ ରାସ୍ତା ଅବରୋଧରୁ ହଟିନଥିଲେ । ସଂଧ୍ୟାରେ ସଦର ଥାନା ଅଧିକାରୀ ପ୍ରଦୀପ ପ୍ରଧାନ ଘଟଣାସ୍ଥଳରେ ପହଞ୍ଚି ଆନେ୍ଦାଳନକାରୀଙ୍କୁ ବୁଝାସୁଝା ଚଳାଇଛନ୍ତି ।
- Advertisement -
