ଢେଙ୍କାନାଳ: ଭାରତୀୟ ଜନ ସଞ୍ଚାର ସଂସ୍ଥାନ (ଆଇଆଇଏମ୍ସି)ର ୨୦୨୬-୨୭ ଶିକ୍ଷାବର୍ଷର ନବାଗତ ଛାତ୍ରଛାତ୍ରୀଙ୍କ ପାଇଁ ଅଗଷ୍ଟ ୬ ଓ ୭ ତାରିଖରେ ଆୟୋଜିତ ଦୁଇଦିନିଆ ଅଭିମୁଖୀକରଣ କାର୍ଯ୍ୟକ୍ରମ ଉଦ୍ଯାପିତ ହୋଇଛି। ଏଥିରେ ଗଣମାଧ୍ୟମ, କର୍ପୋରେଟ୍ ଓ ପ୍ରଶାସନିକ କ୍ଷେତ୍ରର ବିଶିଷ୍ଟ ବ୍ୟକ୍ତିମାନେ ଯୋଗଦେଇ ନବାଗତଙ୍କୁ ମାର୍ଗଦର୍ଶନ କରିଥିଲେ।
ଉଦ୍ଘାଟନୀ ଅଧିବେଶନରେ କୁଳପତି ଡ. ପ୍ରଜ୍ଞା ପାଲିୱାଲ ଗୌର ସାମ୍ବାଦିକତା କେବଳ ବୃତ୍ତି ନୁହେଁ, ସମାଜ ପ୍ରତି ଏକ ଦାୟିତ୍ୱ ବୋଲି କହିଥିଲେ। ରେଜିଷ୍ଟ୍ରାର ଏଲ୍. ମଧୁ ନାଗଙ୍କ ସମେତ ବିଭିନ୍ନ ବିଭାଗ ପକ୍ଷରୁ ଛାତ୍ରଛାତ୍ରୀଙ୍କୁ ସଂସ୍ଥାନର ଶିକ୍ଷା, ପ୍ରଶାସନିକ ବ୍ୟବସ୍ଥା ଓ କ୍ୟାମ୍ପସ ନିୟମ ସମ୍ପର୍କରେ ସୂଚନା ଦିଆଯାଇଥିଲା।
ବିଭିନ୍ନ ଅଧିବେଶନରେ ବିଶେଷଜ୍ଞମାନେ ଟେଲିଭିଜନ, ଡିଜିଟାଲ ମିଡିଆ, କ୍ରୀଡ଼ା, ସ୍ୱାସ୍ଥ୍ୟ ଓ କର୍ପୋରେଟ୍ ଯୋଗାଯୋଗ କ୍ଷେତ୍ରର ସୁଯୋଗ ଓ ଆହ୍ୱାନ ଉପରେ ଆଲୋକପାତ କରିଥିଲେ। ନିଯୁକ୍ତି ସମୟରେ ଗଣମାଧ୍ୟମ ସଂସ୍ଥାଗୁଡ଼ିକ ପ୍ରାର୍ଥୀଙ୍କଠାରୁ ଆଶା କରୁଥିବା ଦକ୍ଷତା, ଜ୍ଞାନ ଓ ବ୍ୟକ୍ତିତ୍ୱ ସମ୍ପର୍କରେ ମଧ୍ୟ ଆଲୋଚନା ହୋଇଥିଲା। ଆଇଆଇଏମ୍ସିର ପୂର୍ବତନ ଛାତ୍ରଛାତ୍ରୀଙ୍କ ସଫଳତା ସମ୍ପର୍କରେ ନବାଗତଙ୍କୁ ଅବଗତ କରାଯାଇଥିଲା।
ପରୀକ୍ଷା ନିୟନ୍ତ୍ରକ ପ୍ରଫେସର ରାକେଶ ଗୋସ୍ୱାମୀ ପରୀକ୍ଷା, ଉପସ୍ଥାନ ଓ ଅନ୍ୟାନ୍ୟ ନିୟମ ସମ୍ପର୍କରେ ସୂଚନା ଦେଇଥିଲେ। ଢେଙ୍କାନାଳ କ୍ୟାମ୍ପସର ଛାତ୍ରଛାତ୍ରୀମାନେ ବିଭିନ୍ନ ଅଧିବେଶନରେ ପ୍ରଶ୍ନ ପଚାରି ବିଶେଷଜ୍ଞଙ୍କଠାରୁ ଉତ୍ତର ପାଇଥିଲେ।
ସମାପନୀ ଅଧିବେଶନରେ ଇଣ୍ଡିଆ ଟୁଡେ ଗ୍ରୁପ୍ର ଗ୍ରୁପ୍ ଏଡିଟୋରିଆଲ୍ ଡିରେକ୍ଟର ରାଜ ଚେଙ୍ଗାପ୍ପା ଯୋଗଦେଇ ପ୍ରଯୁକ୍ତିର ବିକାଶ ସତ୍ତ୍ୱେ ସାମ୍ବାଦିକତାର ମୂଳ ଶକ୍ତି ବିଶ୍ୱସନୀୟତା, ତଥ୍ୟର ସଠିକତା ଓ ଜନସ୍ୱାର୍ଥ ପ୍ରତି ପ୍ରତିବଦ୍ଧତା ବୋଲି କହିଥିଲେ। କୁଳପତି ଡ. ଗୌର ଆଇଆଇଏମ୍ସି ଦାୟିତ୍ୱବୋଧ ସମ୍ପନ୍ନ ଓ ଦକ୍ଷ ଗଣମାଧ୍ୟମ ପେସାଦାର ସୃଷ୍ଟି ପାଇଁ ପ୍ରତିବଦ୍ଧ ବୋଲି କହିଥିଲେ। ଜାତୀୟ ସଙ୍ଗୀତ ପରିବେଷଣ ସହ କାର୍ଯ୍ୟକ୍ରମ ଉଦ୍ଯାପିତ ହୋଇଥିଲା।
- Advertisement -
