ଢେଙ୍କାନାଳ: ସମସ୍ତ ଜଗତରେ ଶାନ୍ତି, ଭାତୃଭାବ ଓ ମାନବତାର ପ୍ରତିକ ଭାବରେ ଗଣାଯାଉଥିବା ଅହମଦିୟା ଖିଲାଫତର ୧୧୭ତମ ବାର୍ଷିକୀ ଅବସରରେ ଗୁଣ୍ଡିଚାପଡ଼ା ଅହମଦିୟା ମୁସଲିମ ଜାମେ ମସଜିଦ ପ୍ରାଙ୍ଗଣରେ ଏକ ଭାବଗମ୍ଭୀର ଧର୍ମ ସଭା ଅନୁଷ୍ଠିତ ହୋଇଗଲା।
୨୭ ମଇ ସନ୍ଧ୍ୟା ସମୟରେ ଆୟୋଜିତ ଏହି ଧର୍ମୀୟ ସଭାର ଅଧ୍ୟକ୍ଷତା କରିଥିଲେ ସମୁଦାୟର ସଭାପତି ସୁଲେମାନ ଅଲୀ ଖାଁ। ଶେଖ୍ ତନୱିର ଶାନ୍ତିପୂର୍ଣ୍ଣ ଧ୍ୱନିରେ ପବିତ୍ର କୁରାନ ଅନୁଶୀଳନ କରିଥିଲେ ଯେବେ କି ଶେଖ୍ ସଫିର ଏକ ଭାବପ୍ରବଣ କବିତା (ନଜମ) ମାଧ୍ୟମରେ ଆତ୍ମିକତା ଜଗାଇଥିଲେ ।
ମୌଲବୀ ମୁଜାଫଫର ଖାଁ ଓ ମୌଲବୀ ଜଲାଲ ଉଦ୍ଦିନ ଖାଁ ଏହି ଅବସରରେ ଖିଲାଫତର ଇତିହାସ, ତାହାର ଆବଶ୍ୟକତା, ଏବଂ ବର୍ତ୍ତମାନ ବିଶ୍ୱ ଶାନ୍ତିରେ ତାହାର ଅବଦାନ ଉପରେ ଗଭୀର ଆଲୋଚନା କରିଥିଲେ। ତେବେ ଏହି ସଭାର ସାରଥି ଥିଲା ଏକ ମହତ୍ତ୍ୱପୂର୍ଣ୍ଣ ସୂଚନା – ଯେଉଁଠାରେ ମହାପୁରୁଷ ହଜରତ ମିର୍ଜା ଗୁଲାମ ଅହମଦ କାଦିୟାନି (ଅ.ସ.) ଙ୍କ ଦେହାନ୍ତ ପରେ ୨୭ ମଇ ୧୯୦୮ ରେ ଖିଲାଫତ ପ୍ରଥା ପୁନଃ ସ୍ଥାପିତ ହୋଇଥିଲା, ଯାହା ଆଜି ବିଶ୍ୱ ଭରି ମନୁଷ୍ୟତା ଓ ଶାନ୍ତିର ପଥରେ ଅଗ୍ରଗାମୀ।
ସଭାପତି ସୁଲେମାନ ଅଲୀ ଖାଁ ତାଙ୍କ ଅଭିଭାଷଣରେ ଉଲ୍ଲେଖ କଲେ, “ଆଜି ବିଶ୍ୱର ୨୦୦ ରୁ ଅଧିକ ଦେଶରେ ଖିଲାଫତ ଦ୍ୱାରା ଅହମଦିୟା ମୁସଲିମ ସମୁଦାୟ ନିରନ୍ତର ଭାବରେ ମାନବ ସେବା, ଶିକ୍ଷା, ଔଷଧ, ଜଳ ପ୍ରଦାନ ଓ ବିଶ୍ୱ ଭାତୃଭାବ ସୃଷ୍ଟି ଲାଗି ଲାଗିରହିଛନ୍ତି। ଆମ ମହାମାନ୍ୟ ଖଲିଫା ହଜରତ ମିର୍ଜା ମସରୁର ଅହମଦ (ଆ.ଇ.) ଙ୍କ ନେତୃତ୍ୱ ଅଧୀନରେ ଏହି ଶାନ୍ତିର ଅଭିଯାନ ଅବିରତ ଚାଲିଛି।
ସଭାର ଶେଷରେ ଉପସ୍ଥିତ ଶ୍ରଦ୍ଧାଳୁମାନେ ସମ୍ପୂର୍ଣ୍ଣ ମନୋନିବେଶରେ ବିଶ୍ୱ ଶାନ୍ତି ଓ ତୃତୀୟ ବିଶ୍ୱଯୁଦ୍ଧର ଆଶଙ୍କାରୁ ସୁରକ୍ଷା ପାଇଁ ଏକ ମୌନ ପ୍ରାର୍ଥନା କରିଥିଲେ ।
- Advertisement -
