ସ୍ୱର୍ଗତ ବିମଳ ମିଶ୍ରଙ୍କ ସ୍ମୃତିରେ ସାଇଁବିରିରେ ପାଠାଗାର ଓ ମାର୍ଗ ଲୋକାର୍ପିତ

ଶୁକ୍ରବାର ଢେଙ୍କାନାଳ ଜିଲ୍ଲା ଦାଣ୍ଡିମାଳ-ସାଇଁବିରିଠାରେ ସ୍ୱର୍ଗତ ବିମଳ ମିଶ୍ରଙ୍କ ସ୍ମୃତିରେ ନିର୍ମିତ ‘ବିମଳ ମିଶ୍ର ଗ୍ରାମ୍ୟ ପାଠାଗାର’ ଓ **‘ବିମଳ ମିଶ୍ର ମାର୍ଗ’**ର ଶୁଭ ଲୋକାର୍ପଣ କରାଯାଇଥିଲା। ଏହି ଅବସରରେ ଧର୍ମେନ୍ଦ୍ର ପ୍ରଧାନ ଯୋଗଦେଇ ସ୍ୱର୍ଗତ ବିମଳ ମିଶ୍ରଙ୍କ ସ୍ମୃତିଚାରଣ କରିଥିଲେ।

ଶ୍ରୀ ପ୍ରଧାନ କହିଥିଲେ, ଉଚ୍ଚ ପଦପଦବୀ ଓ ସଫଳତା ହାସଲ କରିଥିଲେ ମଧ୍ୟ ସ୍ୱର୍ଗତ ବିମଳ ମିଶ୍ର ନିଜ ଜନ୍ମମାଟିକୁ କେବେ ଭୁଲିନଥିଲେ। ଦାଣ୍ଡିମାଳ ଓ ସାଇଁବିରି ଅଞ୍ଚଳର ବିକାଶ ପାଇଁ ସେ ସର୍ବଦା ଚିନ୍ତା କରୁଥିଲେ ଏବଂ ଅନେକ ପ୍ରଶଂସନୀୟ ପଦକ୍ଷେପ ନେଇଥିଲେ। ତାଙ୍କ ଦାୟାଦମାନେ ଏହି ଦୂରଦୃଷ୍ଟିକୁ ଆଗକୁ ନେଇ ସ୍ମୃତିରେ ଜନକଲ୍ୟାଣମୂଳକ ପଦକ୍ଷେପ ନେଇଥିବାରୁ ସେ ପରିବାରବର୍ଗଙ୍କୁ ସାଧୁବାଦ ଜଣାଇଥିଲେ।

ଲୋକଙ୍କ ବୌଦ୍ଧିକ ବିକାଶରେ ସହାୟକ ହେବ ପାଠାଗାର

ନୂତନ ଭାବେ ଲୋକାର୍ପିତ ପାଠାଗାରରେ ଜ୍ଞାନବର୍ଦ୍ଧକ, ଧାର୍ମିକ, ସାହିତ୍ୟିକ, ବିଜ୍ଞାନ ଓ ପ୍ରତିଯୋଗିତାମୂଳକ ପୁସ୍ତକ ସଂଗୃହୀତ ହୋଇଛି। ଏହା ଶିଶୁଙ୍କଠାରୁ ଆରମ୍ଭ କରି ବିଭିନ୍ନ ବୟସର ଲୋକଙ୍କ ବୌଦ୍ଧିକ ଓ ଆଧ୍ୟାତ୍ମିକ ବିକାଶରେ ସହାୟକ ହେବ ବୋଲି ଶ୍ରୀ ପ୍ରଧାନ କହିଥିଲେ।

ସେହିପରି ‘ବିମଳ ମିଶ୍ର ମାର୍ଗ’ ଦ୍ୱାରା ଗ୍ରାମବାସୀ ସିଧାସଳଖ ଜାତୀୟ ରାଜପଥ ସହ ଯୋଡ଼ି ହୋଇପାରିବେ। ଏହା ଅଞ୍ଚଳର ଗମନାଗମନ, ବ୍ୟବସାୟ-ବାଣିଜ୍ୟ ଓ ଚିକିତ୍ସା ସେବା କ୍ଷେତ୍ରରେ ନୂଆ ସୁଯୋଗ ସୃଷ୍ଟି କରିବ ବୋଲି ସେ ମତ ଦେଇଥିଲେ।

ବିକଶିତ ଢେଙ୍କାନାଳ ପାଇଁ ଏକଜୁଟ ହେବାକୁ ଆହ୍ୱାନ

ସ୍ୱାଧୀନତା ଦିବସର ପୂର୍ବସନ୍ଧ୍ୟାରେ ସମସ୍ତେ ଅଞ୍ଚଳର ବିକାଶ ପାଇଁ ନୂଆ ସଂକଳ୍ପ ନେବାକୁ ଶ୍ରୀ ପ୍ରଧାନ ଆହ୍ୱାନ ଦେଇଥିଲେ। ସ୍ଥାନୀୟ ଯୁବପିଢ଼ିଙ୍କ ସ୍ୱପ୍ନ ଓ ଆଶା ପୂରଣ ପାଇଁ ସୁଚିନ୍ତିତ ବିକାଶ ଯୋଜନା ସହ ଆଗକୁ ବଢ଼ିବା ଏବଂ କାନ୍ଧରେ କାନ୍ଧ ମିଳାଇ ସାଇଁବିରି ସମେତ ସମଗ୍ର ଢେଙ୍କାନାଳକୁ ସମୃଦ୍ଧ, ସ୍ୱାଭିମାନୀ ଓ ବିକଶିତ ଅଞ୍ଚଳ ଭାବେ ଗଢ଼ିତୋଳିବା ଉପରେ ସେ ଗୁରୁତ୍ୱାରୋପ କରିଥିଲେ।

ଏହି କାର୍ଯ୍ୟକ୍ରମରେ ଢେଙ୍କାନାଳ ସାଂସଦ ରୁଦ୍ରନାରାୟଣ ପାଣି, କାମାକ୍ଷାନଗର ବିଧାୟକ ଶତ୍ରୁଘ୍ନ ଜେନା, ପରଜଙ୍ଗ ବିଧାୟକ ବିଭୂତି ପ୍ରଧାନ ଓ ହିନ୍ଦୋଳ ବିଧାୟିକା ସୀମାରାଣୀ ନାୟକଙ୍କ ସମେତ ସ୍ଥାନୀୟ ଜନପ୍ରତିନିଧି, ବିଶିଷ୍ଟ ବ୍ୟକ୍ତିବିଶେଷ ଓ ବହୁ ସଂଖ୍ୟକ ଗ୍ରାମବାସୀ ଉପସ୍ଥିତ ଥିଲେ।