କଟକ : ପଞ୍ଚାୟତ ନିର୍ବାଚନରେ ପାଇଁ ରହିଥିବା ଆସନ ସଂରକ୍ଷଣ ସଂକ୍ରାନ୍ତ ବିଜ୍ଞପ୍ତି ପ୍ରତ୍ୟାହାର କରାଯିବ। ଏ ନେଇ ସାନି ସଂରକ୍ଷଣ ତାଲିକା ରାଜ୍ୟସରକାର ପ୍ରସ୍ତୁତ କରିବେ। ଚୂଡ଼ାନ୍ତ ତାଲିକା ପ୍ରଦାନ ପରେ ଏ ନେଇ ସାନି ବିଜ୍ଞପ୍ତି ଜାରି କରାଯିବ। ପୂର୍ବରୁ ପ୍ରସ୍ତୁତ ତାଲିକାରେ ତ୍ରୁଟି ଥିବା ଦର୍ଶାଇ ଓଡ଼ିଶା ଉଚ୍ଚନ୍ୟାୟାଳୟରେ ଆବେଦନ କରାଯିବା ପରେ ରାଜ୍ୟସରକାରଙ୍କ ପକ୍ଷରୁ ଏନେଇ ସାନି ସତ୍ୟପାଠ ଦାଖଲ କରାଯାଇଛି।
୨୦୨୨ ଜାନୁୟାରୀ ୩ ତାରିଖରେ ସଂରକ୍ଷଣକୁ ନେଇ ବ୍ଲକ ଓ ଜିଲା ସ୍ତରରେ ଆପତ୍ତି ଅଭିଯୋଗ ଶୁଣାଣି କରାଯିବ। ଏହାର ଦୁଇଦିନ ପରେ ଅର୍ଥାତ୍ ୫ ତାରିଖରେ ଶୁଣାଣିର ସମାଧାନ କରାଯିବ ଏବଂ ୭ ତାରିଖରେ ଏନେଇ ଚୂଡାନ୍ତ ତାଲିକା ପ୍ରକାଶ ପାଇବ। ଜାନୁୟାରୀ ୮ ତାରିଖରେ ପଞ୍ଚାୟତରାଜ ପକ୍ଷରୁ ରାଜ୍ୟ ନିର୍ବାଚନ ଆୟୋଗଙ୍କୁ ଚୂଡାନ୍ତ ତାଲିକା ଦିଆଯିବ। ତେବେ କେବେ ନିର୍ବାଚନ ହେବ ଏ ନେଇ ରାଜ୍ୟ ନିର୍ବାଚନ କମିଶନ ଘୋଷଣା କରିବେ। ତେବେ ମାର୍ଚ୍ଚ ୮ ତାରିଖ ପୂର୍ବରୁ ନିର୍ବାଚନ ପ୍ରକ୍ରିୟା ଶେଷ କରିବାକୁ ଉଚ୍ଚ ନ୍ୟାୟାଳୟ ଓଡ଼ିଶା ସରକାରଙ୍କୁ ମୁଖ୍ୟ ବିଚାରପତି ଡକ୍ଟର ଜଷ୍ଟିସ ଏସ.ମୁରଲୀଧର ଓ ଜଷ୍ଟିସ୍ ଆଦିତ୍ୟ କୁମାର ମହାପାତ୍ରଙ୍କୁ ନେଇ ଗଠିତ ଖଣ୍ଡପୀଠ ନିର୍ଦେଶ ଦେଇଥିବା ଜଣାପଡିଛି। ଯେଉଁଠି ଜିଲାପରିଷଦ, ସରପଞ୍ଚ, ସମିତି ସଭ୍ୟଙ୍କ ପାଇଁ ଆସନ ଓବିସିଙ୍କ ପାଇଁ ସଂରକ୍ଷଣ ହୋଇଛି, ତାହାକୁ ପରିବର୍ତ୍ତନ କରାଯିବ। ଏ ନେଇ ଓଡ଼ିଶା ଉଚ୍ଚନ୍ୟାୟାଳୟଙ୍କ ରାୟ ଆସିବା ପରେ ସଂରକ୍ଷଣ ତାଲିକାକୁ ପ୍ରତ୍ୟାହାର କରାଯିବ ବୋଲି ସରକାର କହିଛନ୍ତି। ଆସନ୍ତା ୨୭ ତାରିଖରେ ସଂରକ୍ଷଣ ସଂକ୍ରାନ୍ତ ଏକ ପୁନଃ ଚିଠା ତାଲିକା ପ୍ରକାଶ ପାଇବ।
ପଞ୍ଚାୟତ ନିର୍ବାଚନରେ ପଛୁଆବର୍ଗଙ୍କ ଲାଗି ରହିଥିବା ଆସନ ସଂରକ୍ଷଣ ଚିଠା ଓ ବିଜ୍ଞପ୍ତିକୁ ଚାଲେଞ୍ଜ କରି ଓଡ଼ିଶା ଉଚ୍ଚ ନ୍ୟାୟାଳୟରେ ସରକାରଙ୍କ ଏହି ବିଜ୍ଞପ୍ତି ୧୯୯୨ର ୭୩ତମ ସମ୍ବିଧାନ ସଂଶୋଧନ ବ୍ୟବସ୍ଥାର ବିରୋଧାଚରଣ କରୁଛି ବୋଲି ଆବେଦନକାରୀ ବୀରେନ୍ଦ୍ର ଦାସ ଦର୍ଶାଇଥିଲେ। ପଛୁଆ ବର୍ଗଙ୍କ ଆସନ ସଂରକ୍ଷଣ ନିମନ୍ତେ ମହାରାଷ୍ଟ୍ର ଓ ମଧ୍ୟପ୍ରଦେଶ ରାଜ୍ୟ କ୍ଷେତ୍ରରେ ଚଳିତ ଡିସେମ୍ବରରେ ସର୍ବୋଚ୍ଚ ନ୍ୟାୟାଳୟ ଯେଉଁ ରାୟ ପ୍ରଦାନ କରିଥିଲେ ସେହି ଆଧାରରେ ଉଚ୍ଚ ନ୍ୟାୟାଳୟ ଓଡ଼ିଶା ସରକାରଙ୍କୁ ଅନୁରୂପ ନିର୍ଦେଶ ଦେଇଛନ୍ତି। ଏଥିସହ ନିକଟରେ ସଂରକ୍ଷଣ ନେଇ ଜାରି ହୋଇଥିବା ବିଜ୍ଞପ୍ତିକୁ ପ୍ରତ୍ୟାହାର କରିବା ଓ ଖୁବ୍ଶୀଘ୍ର ନୂତନ ସଂରକ୍ଷଣ ଚିଠା ତାଲିକା ପ୍ରଦାନ କରିବାକୁ ଉଚ୍ଚ ନ୍ୟାୟାଳୟ ନିର୍ଦେଶ ଦେଇଛନ୍ତି।
ଅଦାଲତଙ୍କ ନିର୍ଦେଶ ଅନୁଯାୟୀ, ଯଦି କୌଣସି ଅଞ୍ଚଳରେ ପଛୁଆବର୍ଗଙ୍କ ଜନସଂଖ୍ୟାର ନିର୍ଦିଷ୍ଟ ତଥ୍ୟ ଉପଲବ୍ଧ ନଥିବ; ସେ ଅଞ୍ଚଳରେ ପଛୁଆବର୍ଗଙ୍କ ପାଇଁ ଥିବା ସଂରକ୍ଷିତ ଆସନ ଅଣସଂରକ୍ଷିତ ରହିବ ଏବଂ ଏହି ଆଧାରରେ ଆଗାମୀ ନିର୍ବାଚନରେ ପଛୁଆ ବର୍ଗଙ୍କ ପାଇଁ ଥିବା ସଂରକ୍ଷିତ ଆସନ ଅଣସଂରକ୍ଷିତ ରହିବ ବୋଲି ଅଦାଲତ ନିର୍ଦେଶ ଦେଇଛନ୍ତି। ସେହିପରି ସରପଞ୍ଚ, ସମିତି ଅଧ୍ୟକ୍ଷ ଓ ଜିଲା ପରିଷଦ ପଦ ନିମନ୍ତେ ରାଜ୍ୟର ଜନସଂଖ୍ୟା ପ୍ରତିଶତ ଅନୁଯାୟୀ, ଅନୁସୂଚିତ ଜାତି, ଜନଜାତି ପାଇଁ ଆସନଗୁଡିକ ସଂରକ୍ଷିତ କରିବା ପାଇଁ ଅଦାଲତ ନିର୍ଦେଶ ଦେଇଛନ୍ତି। ସମସ୍ତ ଜିଲାପାଳ ଏହି ତାଲିକାକୁ ପୁଣି ପ୍ରକାଶନ କରିବାକୁ ନିର୍ଦେଶ ଦେଇଛନ୍ତି ଅଦାଲତ।